Smartphones: os maiores recadadores de información. Consellos para aumentar a nosa seguridade.¶

Os teléfonos móbiles convertéronse nun elemento esencial na nosa vida diaria, pero tamén representan un risco para a nosa privacidade. Ademais de todos os consellos mencionados nos capítulos anteriores, neste danse unha serie de consellos específicos para para protexer a túa privacidade nos dispositivos móbiles.

Consellos xerais¶

Actualizacións do sistema e das aplicacións: Manter o sistema operativo e as aplicacións sempre actualizados é unha das mellores defensas contra vulnerabilidades. As actualizacións adoitan incluír parches de seguridade que corrixen fallos descubertos recentemente, polo que é esencial instalar as actualizacións canto antes.
Uso dun pin ou patrón para protexer o teu dispositivo: é recomendable que para empregar o teu dispositivo teñas que introducir algún pin, contrasinal ou patrón de desbloqueo. Isto evita que alguén que teña acceso ao teu dispositivo non poida acceder ás túas aplicacións e datos. Ollo coa biometría. É certo que empregar a nosa pegada ou a nosa cara para desbloquear a nosa cara é moi práctico, sen ter que andar metendo o pin, patrón ou contrasinal. Sen embargo, alguén podería acceder ao teu dispositivo (e incluso á túa conta do banco) se por exemplo te quedas inconsciente. No caso do desbloqueo facial, incluso hai casos nos que se logrou desbloquear o dispositivo empregando unha fotografía.
Bloqueo específico de aplicacións: Se queres usar igualmente o desbloqueo por biometría, é recomendable que para aplicación críticas como pode ser a do banco ou o teu xestor de contrasinais actives de forma específica o bloqueo por patrón ou pin.
Permisos das aplicacións: Revisa e controla os permisos que concedemos ás aplicacións. Moitas aplicacións piden acceso innecesario a datos ou funcións do dispositivo, como a cámara, o micrófono ou a localización. Só concede os permisos estritamente necesarios para o funcionamento da aplicación.
Descarga de aplicacións de fontes oficiais: Evita instalar aplicacións de fontes non verificadas, e instálaas só a través de tendas oficiais como F-Droid, Google Play ou a App Store. As aplicacións descargadas de fontes externas poden conter malware ou outros programas maliciosos.
Configurar un DNS privado: Como comentamos no capítulo DNS seguro. Que é e alternativas seguras sobre DNS seguros, recomendamos configurar un DNS seguro no teu móbil.
Empregar aplicacións libres na medida do posible: Bótalle un ollo ao capítulo Alternativas libres e encriptadas no que che falamos sobre alternativas libres ás que empregar no teu día a día.
Empregar sistemas operativos libres: No capítulo Os Sistemas Operativos. Alternativas libres e seguras. falámosche de que é un sistema operativo, e na sección Alternativas libres para móbiles e como instalalas dámosche unha serie de sistemas operativos libres alternativos ao Android de Google e a iOS.

Riscos da previsualización das notificacións¶

Moitos dispositivos móbiles permiten que as notificacións das aplicacións se amosen na pantalla de bloqueo ou como pancartas emerxentes, incluso sen desbloquear o dispositivo. Aínda que esta funcionalidade pode ser útil para ver rapidamente mensaxes ou alertas importantes, tamén presenta riscos de seguridade e privacidade.

Exposición de información persoal¶

Se as notificacións amosan contido sensible, outras persoas poderían acceder a esa información sen necesidade de desbloquear o dispositivo. Isto pode incluír:

Códigos de verificación enviados por SMS ou aplicacións de autenticación, facilitando ataques de suplantación de identidade.
Mensaxes privadas en aplicacións de mensaxería
Correos electrónicos con información confidencial, como datos bancarios ou detalles laborais.
Notificacións de aplicacións financeiras que poderían revelar saldos ou movementos bancarios.

Facilidade para ataques de Shoulder Surfing¶

O chamado Shoulder Surfing consiste en que alguén observe a pantalla do dispositivo sen permiso, aproveitando situacións cotiás, como o uso do móbil en transporte público ou en lugares concorridos. Se a previsualización das notificacións está activada, unha persoa pode:

Ler mensaxes privadas sen que a usuaria se decate.
Ver códigos de autenticación de uso único (OTP) en tempo real.
Obter información sobre contactos, eventos ou outras actividades da usuaria.

Filtración de información en ambientes laborais¶

Nun contorno profesional, a previsualización de notificacións pode comprometer información sensible:

Mensaxes con datos de clientes ou proxectos que non deberían ser vistos por terceiras persoas.
Correos electrónicos internos con información estratéxica da empresa.
Notificacións de reunións ou eventos confidenciais que poden ser aproveitados por terceiros.

Medidas de protección¶

Para minimizar os riscos asociados á previsualización das notificacións, recoméndase:

Desactivar a previsualización na pantalla de bloqueo: Nos axustes do sistema, pódese configurar para que só se vexa o remitente ou que non se mostre ningunha información ata que o dispositivo estea desbloqueado.
Usar a autenticación biométrica ou PIN para ver notificacións: En moitos sistemas, é posible configurar que as notificacións só se amosen tras a autenticación da usuaria.
Restrinxir notificacións sensibles: Moitas aplicacións permiten configurar como se mostran as súas notificacións, evitando que contido crítico apareza en lugares accesibles.
Ter coidado en lugares públicos: Evitar expor a pantalla do móbil en lugares onde outras persoas poidan ver a información que aparece.

Riscos dos smartwatches e o acceso ás notificacións¶

Os reloxos intelixentes (smartwatches) convertéronse en dispositivos populares que permiten recibir notificacións, monitorizar actividade física e interactuar co teléfono sen necesidade de sacalo do peto. Porén, a súa comodidade vén acompañada de certos riscos para a privacidade e a seguridade, especialmente cando teñen acceso total ás notificacións e ao seu contido.

Acceso total a mensaxes e datos sensibles¶

Moitos smartwatches requiren permiso para acceder a todas as notificacións do teléfono para poder mostralas na súa pantalla. Isto significa que poden recibir e almacenar:

Mensaxes privadas de aplicacións
Correos electrónicos completos
Códigos de verificación de dobre factor (2FA), facilitando ataques de suplantación de identidade.
Notificacións de bancos ou outras entidades financeiras con información sensible.

A maioría dos smartwatch conteñen software privativo, polo que non podemos saber que tratamento lle da o fabricante a eses datos. Por exemplo, podería compartilos con terceiros para distintos tipos de usos. Ademais, se o smartwatch non ten mecanismos de seguridade adecuados, calquera persoa pode acceder a eses datos simplemente observando a súa pantalla ou manipulándoo sen restricións.

Interceptación de datos mediante Bluetooth¶

Os smartwatches adoitan conectarse ao teléfono a través de Bluetooth, unha tecnoloxía que pode ser vulnerable a ataques como:

Ataques de sniffing: Un atacante pode interceptar a comunicación entre o smartwatch e o teléfono se a conexión non está cifrada correctamente.
Ataques Man-in-the-Middle (MitM): Se a conexión Bluetooth é comprometida, un atacante pode modificar ou escoitar as notificacións sen que a usuaria o saiba.
Emparellamentos non autorizados: Algunhas vulnerabilidades permiten que dispositivos descoñecidos se conecten a un smartwatch sen autorización da usuaria.

Medidas de protección¶

Para minimizar os riscos asociados ao uso de smartwatches con acceso a notificacións, recoméndase:

Configurar a privacidade das notificacións: Desactivar a previsualización de mensaxes completas no smartwatch e permitir só as máis necesarias.
Activar mecanismos de bloqueo: Se o smartwatch permite establecer un PIN ou algún tipo de bloqueo, activalo para evitar accesos non autorizados.
Revisar os permisos das aplicacións: Asegurarse de que só as aplicacións esenciais teñen acceso ás notificacións.
Protexer a conexión Bluetooth: Manter Bluetooth desactivado cando non se use e evitar emparellamentos en lugares públicos.

Conclusión¶

A integración dos smartwatches coas notificacións do teléfono é moi útil, pero tamén introduce riscos de seguridade e privacidade. A configuración axeitada dos permisos e o uso de medidas de protección pode axudar a reducir estes riscos e garantir un uso máis seguro destes dispositivos.