Mellorar a seguridade do noso navegador¶

A importancia da seguridade do noso navegador,¶

Na actualidade, o navegador web é unha das ferramentas máis utilizadas para acceder a información en liña, realizar compras, traballar e interactuar coas redes sociais. Porén, tamén é a porta de entrada para a nosa privacidade e seguridade na internet. A través do navegador, compartimos datos persoais, accedemos a sitios web e interactuamos con diversas plataformas, polo que é crucial garantir que a nosa navegación sexa o máis segura e privada posible.

Moitas veces, os navegadores web recollen e almacenan información sobre a nosa actividade en liña, como cookies, historial de navegación ou datos persoais. Ademais, existen unha serie de riscos asociados ao uso do navegador, como o seguimento da nosa actividade, a exposición a sitios web maliciosos ou o roubo de información sensible. Por iso, é fundamental adoptar medidas que protexan a nosa privacidade e seguridade mentres navegamos.

Neste capítulo, exploraremos diferentes estratexias e ferramentas que podemos empregar para mellorar a seguridade e a privacidade no noso navegador, dende o uso de navegadores libres até a configuración de extensións que bloquean rastreadores e protexen os nosos datos persoais.

Diferenza entre navegador e motor de busca. Alternativas seguras¶

Un navegador web e un motor de busca son dous elementos esenciais para navegar por internet, pero teñen funcións distintas.

Un navegador web é un software que permite ás usuarias acceder a sitios web e visualizar o seu contido. Exemplos populares de navegadores son Google Chrome, Mozilla Firefox, Safari e Microsoft Edge. O navegador é o programa que empregamos para interactuar coas páxinas web, e tamén se encarga de xestionar as conexións seguras, almacenar cookies e historial de navegación, e ofrecer funcionalidades adicionais mediante extensións.

Por outra banda, un motor de busca é un servizo en liña que axuda ás usuarias a encontrar sitios web mediante a introdución de palabras clave ou frases. Os motores de busca, como Google, Bing ou DuckDuckGo, indexan millóns de sitios web e permiten ás usuarias realizar buscas para atopar o contido que desexan. O motor de busca serve como unha guía para localizar información en internet, pero non ten un control directo sobre como se accede ou se amosa ese contido no navegador.

Mentres o navegador xestiona a interacción coas páxinas web, o motor de busca só facilita a localización desa información. A diferenza entre ambos é fundamental, xa que os motores de busca tamén recollen información sobre as nosas consultas, e por tanto tamén son un posible risco para a nosa privacidade.

Alternativas libres¶

Existen alternativas libres e de código aberto tanto para navegadores como para motores de busca que respectan mellor a nosa privacidade e seguridade en liña. A continuación, destacan algúns exemplos de cada un:

Navegadores libres (xa explicados na sección Navegador web):
Mozilla Firefox
Tor Browser
Motores de busca libres (xa explicados na sección Buscador web):
StartPage
SearX

O uso de navegadores e motores de busca libres non só mellora a nosa privacidade, senón que tamén contribúe ao apoio de proxectos que promoven un internet máis aberto e libre, sen depender de grandes corporacións que recollen e comercializan os nosos datos persoais.

Extensións libres que aumentan a nosa privacidade¶

As extensións para os navegadores son ferramentas poderosas que nos permiten mellorar a nosa privacidade e seguridade en liña. Moitas destas extensións están deseñadas para bloquear rastreadores, mellorar o control sobre as nosas cookies, protexer contra sitios maliciosos e mellorar a seguridade da nosa navegación. A continuación, expóñense algúns exemplos de extensións de software libre que podemos utilizar para mellorar a nosa privacidade en internet (todas elas dispoñibles, polo menos, en Firefox):

uBlock Origin: Un bloqueador de anuncios e rastreadores de código aberto que permite bloquear de forma eficaz anuncios intrusivos, rastreadores e scripts non desexados, mellorando a privacidade e a velocidade de carga das páxinas.
Privacy Badger: Desenvolvido pola Electronic Frontier Foundation (EFF), Privacy Badger detecta e bloquea automaticamente os rastreadores que están a seguir á usuaria sen o seu consentimento, mellorando a privacidade sen a necesidade de configurar regras manualmente.
HTTPS Everywhere: Desenvolvida pola EFF, esta extensión forza que as páxinas web utilicen HTTPS en lugar de HTTP, garantindo así que as nosas conexións sexan cifradas e seguras. Sen embargo, a maioría de navegadores xa inclúen esta opción nas súas configuración, polo que se pode modificar directamente.

Estas extensións de software libre proporcionan unha forma sinxela e eficaz de mellorar a nosa privacidade e seguridade ao navegar por internet. A pesar de que as extensións de navegador son ferramentas útiles para mellorar a nosa privacidade e seguridade, é fundamental ter coidado cos permisos que lles concedemos. Moitas veces, as extensións solicitan permisos para acceder a información sensible ou modificar o funcionamento do navegador, polo que é importante revisar coidadosamente os permisos que nos piden antes de instalar calquera extensión. Ademais, é recomendable instalar só extensións que proviñan de fontes seguras, como as que se atopan na tenda oficial do navegador, xa que estas pasan un control de seguridade para evitar que sexan maliciosas ou invasivas. Por exemplo, Firefox ten unha categoría de extensións verificadas que garanten un maior nivel de confianza. Tamén debemos ter en conta que, en algúns casos, pode ser necesario desactivar temporalmente certas extensións para poder visualizar algúns sitios web correctamente, xa que algúns sitios poden bloquear ou non ser compatibles coas funcións de bloqueo de anuncios ou rastreadores, por exemplo. Por iso, é importante manter un equilibrio entre a protección da nosa privacidade e a funcionalidade do navegador.

Outras configuracións útiles¶

Ademais das extensións, existen outras configuracións no navegador que poden mellorar notablemente a nosa privacidade e seguridade. A continuación, explícanse algúns axustes importantes que podemos aplicar:

Bloqueo de rastreadores: Moitos navegadores modernos permiten activar o bloqueo de rastreadores de forma nativa ou a través de configuracións de extensións. Isto impide que sitios web rastrexen a nosa actividade e recollan datos sen o noso consentimento. É importante activar estas opcións para reducir a cantidade de información persoal que se recolle sen nos dar conta.
Borrar os datos ao pechar o navegador: Configurar o navegador para eliminar automaticamente o historial de navegación, cookies, caché e outros datos ao pechar o navegador é unha boa práctica para protexer a nosa privacidade. Isto evita que outras persoas que usen o mesmo dispositivo poidan acceder á nosa actividade previa.
Contrasinal mestra: Activar unha contrasinal mestra no navegador pode ser útil para protexer contrasinais almacenados no xestor de contrasinais do navegador. Isto garante que, incluso se alguén ten acceso ao dispositivo, non poida acceder facilmente ás nosas contas en liña sen coñecer esta contrasinal adicional.
Desactivar o seguimento de posición: Moitos navegadores permiten desactivar a función de seguimento de posición ou acceso á nosa localización. Ao desactivar esta opción, evitamos que sitios web e servizos poidan acceder á nosa localización física sen o noso consentimento.
Usar un DNS seguro: Cambiar a configuración do DNS para usar servizos de DNS seguros, como o DoH ou DoT, pode mellorar a nosa privacidade e evitar que o noso ISP ou outros terceiros poidan rastrear as nosas consultas DNS.
Desactivar complementos non necesarios: Moitos navegadores permiten activar ou desactivar complementos e scripts. É importante desactivar os complementos que non necesitamos, xa que poden ser un punto de entrada para ataques de malware ou ser utilizados para recoller información sobre a nosa actividade.
Usar navegación privada en ordenadores compartidos: Cando usamos un ordenador compartido ou público, é altamente recomendable empregar o modo de navegación privada ou incógnito. Este modo impide que o navegador garde o historial de navegación, as cookies e os datos de sesión, xa que se borran unha vez o pechamos. Ao usar este modo, evitamos que outras persoas que usen o mesmo dispositivo poidan ver as nosas actividades en liña ou acceder a información sensible, como contas en liña ou contrasinais gardados. Ademais, en caso de que vaias persoas adoiten compartir un ordenador, recoméndase que cada unha teña o seu propio perfil de usuaria no ordenador, e non compartir.